Türkmen oba hojalyk institutynyň hem-de Türkmenistanyň Senagatçylar we telekeçiler partiýasynyň Daşoguz welaýat komiteti bilen bilelikde guramagynda Medeniýet we sungat işgärleriniň hem-de Magtymguly Pyragynyň şygryýet güni mynasybetli institutyň talyplarynyň arasynda “AgroTechFuture: durnukly ösüş üçin agroinnowasiýalar” atly işewürlik-telekeçilik Start-up bäsleşigini geçirmegiň
DÜZGÜNNAMASY
I. Adalgalar we kesgitlemeler
Şu Düzgünnamada aşakdaky adalgalar ulanylýar:
- “AgroTechFuture: durnukly ösüş üçin agroinnowasiýalar” atly işewürlik-telekeçilik Start-up bäsleşigi – özleriniň oba hojalyk çözgütlerini hödürleýän talyp ýaşlar üçin guralýan bäsleşik;
- Bäsleşige gatnaşmaga dalaşgär – onlaýn hasaba alnyşy geçen we saýlama tapgyra gatnaşýan talyp;
- Gatnaşyjy – saýlama tapgyryndan üstünlikli geçen we jemleýji tapgyra gatnaşýan talyp;
- Bäsleşige gatnaşmak üçin arza – ýokary okuw mekdepleriniň web-saýtlarynda ýerleşdirilen hasaba alnyş formasy;
- Guramaçylyk topary – bäsleşigi geçirýän we guramaçylygyna jogapkär şahslar;
- Bäsleşigiň hyzmatdaşlary – bäsleşigiň guramaçylygyna goldaw (maglumat, tehniki, maddy) berýän şahslar;
- Eminler topary – hödürlenen taslamalaryň arasynda iň oňatlaryny kesgitlemek boýunça netije çykarýan düzüm;
- Bäsleşigiň web-sahypasy – bäsleşige gatnaşmak üçin arza tabşyryp bolýan we bäsleşik barada giňişleýin maglumat alyp bolýan www.tohi.edu.tm web-saýtynda ýerleşdirilen web-sahypa;
- Ugur – taslamanyň barlaglarynyň pudagy;
- Bäsleşigiň talaplary – taslamanyň hil derejesi kesgitlenilýän we olaryň arasyndan iň oňat taslamalary saýlap almaklyk üçin bahalandyryş talaplary;
- Ideýany/taslamany tanyşdyrmaklyk – ideýany/taslamany PowerPoint programmasy arkaly tanyşdyrmak;
- Jemleýji tapgyr – saýlama tapgyra hödürlenen işlerden saýlanan işleriň gatnaşmagy bilen geçýän, bäsleşigiň ahyrky tapgyry;
- Ýeňiji – jemleýji tapgyrda saýlanan işleriň içinde iň oňat diýlip saýlanan ideýany/taslamany ýerine ýetiriji.
II. Umumy düzgünler
2.1. Şu Düzgünnama “Bilim hakynda”, “Innowasiýa işi hakynda”, “Rasionalizatorçylyk işi hakynda”, “Ylmy-tehnologiýa parklary hakynda” Türkmenistanyň Kanunlaryna laýyklykda, täjirçilik mümkinçilikleri bar bolan we ösüşiň başlangyç tapgyrynda duran taslamalary durmuşa geçirmek, täze harytlary, önümleri, tehnologiýalary ýa-da ylmy-tehniki we tehnologiki barlaglaryň netijelerini peýdalanmak bilen hyzmatlary işläp taýýarlamak boýunça “AgroTechFuture: durnukly ösüş üçin agroinnowasiýalar” atly işewürlik-telekeçilik Start-up bäsleşiginiň (mundan beýläk - Bäsleşik) guramaçylygynyň we geçirilmeginiň, guramaçylyk-usuly üpjünçiliginiň, gatnaşyjylaryň düzümini, bäsleşigiň ýeňijilerini yglan etmegiň tertibini kesgitleýär.
2.2. Bäsleşigiň maksady talyplary özbaşdak ýa-da toparlaýyn esasda ideýany/taslamany döretmek we ösdürmek arkaly tehnologiki telekeçiligiň tejribesini almak mümkinçiligini döretmekden ybarat.
2.3. Bäsleşigiň esasy wezipeleri:
- özboluşly ideýalaryň/taslamalaryň gözlegi;
- peýdaly we girdejili ideýalary/taslamalary işläp taýýarlamakda ýaşlara goldaw bermek;
- innowasion pikirlere eýe bolan ýaşlary ýüze çykarmak.
2.4. Işewürlik-telekeçilik Start-up bäsleşigini guramaçylary hökmünde Türkmen oba hojalyk instituty we Türkmenistanyň Senagatçylar we telekeçiler partiýasynyň Daşoguz welaýat komiteti (mundan beýläk – Guramaçylar) çykyş edýärler.
III. Esasy düzgünler
3.1. Bäsleşik barada ähli maglumatlar ýokary okuw mekdebiniň www.tohi.edu.tm web-saýtynda beýan ediler.
3.2. Bäsleşik 2024-nji ýylyň iýun aýynyň 24-nde geçirilýär.
3.3. Bäsleşigiň ugurlary:
- Agrotelekeçilik – oba hojalygynyň we maldarçylygyň ösüşi, söwda bazarlaryny tebigy we peýdaly azyk önümleriniň bolçulygy bilen üpjün etmek, mysal üçin, ýyladyşhanalary gurmak, oba hojalyk mallaryny köpeltmek, ösümlikleri ekmek we ösdürip ýetişdirmek;
- Informasion tehnologiýalar (IT) – tehniki we maglumat ulgamlarynyň ösüşiniň esasy ugurlarynyň biri, ýokary hilli gadžetler we mobil goşundylar, ýokary tizlikli maglumat elýeterliligi, uzak aralykdan okuwlar we ş.m.;
- Ylym we tehnologiýalar – oba hojalyk pudagynda ylmy-tehniki öňegidişlik, ylym pudagynda oýlap tapyşlar, ideýalar we taslamalar (matematika, biologiýa, himiýa, fizika).
3.4. Bäsleşige Türkmen oba hojalyk institutynda bilim alýan talyp ýaşlar gatnaşyp bilerler.
3.5. Ideýalaryň/taslamalaryň hiline baha bermek we bäsleşigiň üç ugry boýunça netijelerini jemlemek üçin eminler topary dörediler.
3.6. Eminler topary ýollanan işleri barlaýarlar we düzgünnamada görkezilen bahalandyryş şertlerine baglylykda baha berýärler.
IV. Eminler toparynyň düzülişi we işi
4.1. Eminler toparynyň düzümi gatnaşyjylaryň arzalaryna, tanyşdyryş işlerine, ideýalaryň/taslamalaryň goralyşyna baha bermek üçin tassyklanylýar.
4.2. Eminler toparynyň agzalary guramaçylaryň mugallymlaryndan we hünärmenlerinden düzülýär.
4.3. Eminler topary 5 agzadan ybarat bolup, bäsleşigiň düzgünlerini we talaplaryny berjaý etmeklige, bäsleşigiň dowamynda oňa degişli maglumatlary, şol sanda gatnaşyjylaryň şahsy maglumatlaryny aýan etmezlige borçlanýarlar.
4.4. Eminler toparynyň işi ugradylan işlere baha bermeklikde, jemleýji tapgyrda öz ideýalaryny/taslamalaryny goramak üçin degişli bahalandyryş talaplary esasynda iň oňat işleri saýlamakda, şeýle hem “AgroTechFuture: durnukly ösüş üçin agroinnowasiýalar” atly işewürlik-telekeçilik Start-up bäsleşiginiň ýeňijilerini kesgitlemek bilen jemlenýär.
V. Bäsleşigi geçirmegiň tapgyrlary
5.1. Bäsleşige hasaba alnyş, ideýa/taslama barada maglumatlary (PowerPoint programmasy arkaly ideýanyň/taslamanyň tanyşdyrylyşy) 2024-nji ýylyň iýun aýynyň 20-ne çenli kabul ediler. Bäsleşige degişli resminamalary tohi.tm.info@gmail.com elektron salga ýollamaly.
5.2. Jemleýji tapgyr 2024-nji ýylyň iýun aýynyň 24-nde Türkmen oba hojalyk institutynda geçiriler.
Ideýalaryň/taslamalaryň awtorlary öz işlerini eminler toparynyň agzalarynyň öňünde özleriniň liderlik häsiýetlerini we ideýanyň/taslamanyň taýýarlanyş derejesini görkezmek bilen çykyş etmelidirler. Ideýalary/taslamalary bahalandyrmak işi şu Düzgünnamanyň indiki bölüminde getirilen talaplar esasynda amala aşyrylar.
VI. Ideýalary we taslamalary bahalandyrmagyň talaplary
6.1. Ideýalary/taslamalary bahalandyrmagyň talaplary:
- ideýanyň/taslamanyň wajyplygy, onuň ähmiýeti we peýdasy;
- ideýanyň/taslamanyň özboluşlylygy we (ýa-da) täzeçilligi;
- hödürlenýän taslamany durmuşa ornaşdyrmak mümkinçiligi;
- ideýanyň/taslamanyň taýýarlanyş derejesi we hili (statistika, işewürlik maksatnamasy, meseläniň öwreniliş derejesi, hödürlenýän taslama arkaly kesgitli meseläni çözmegiň usullary, çaklama, artykmaçlyklary hem-de kemçilikleri we ş.m.).
6.2. Jemleýji tapgyrynda ideýalary/taslamalary bahalandyrmagyň talaplary:
- ideýanyň/taslamanyň wajyplygy;
- bäsleşige ukyplylyk aýratynlyklary;
- ideýanyň/taslamanyň taýýarlanyş hiliniň derejesi;
- ideýany/taslamany goraýyş derejesi;
- ideýany/taslamany durmuşa ornaşdyrmak mümkinçiligi.
VII. Bäsleşigiň ýeňijilerini kesgitlemegiň we sylaglamagyň tertibi
7.1. Bäsleşigiň jemleýji tapgyrynyň ýeňijileri guramaçylar tarapyndan diplomlar we sowgatlar bilen sylaglanarlar.