Weterinar lukmançylygy fakulteti
Türkmen oba hojalyk institutynyň Weterinar lukmançylygy fakulteti aşakdaky ukyplara eýe bolan ýokary hünärli, bäsleşige ukyply hünärmenleri taýýarlaýar:
- mallaryň keselleriniň toplumlaýyn diagnozyny, öňüni alyş we bejeriş işlerini geçirmäge;
- oba hojalyk mallarynyň önümliligini (et, süýt, ýüň) ýokarlandyrmak maksady bilen, olaryň seçgisiniň, köpeldilişiniň, iýmitlenilişiniň we saklanylyşynyň häzirkizaman usullaryny özleşdirmäge;
- önümçilik işlerini kadalaşdyrmak, girdejililigi ýokarlandyrmak we pudagyň durnukly ösüşini üpjün etmek üçin oba hojalyk kärhanalaryny guramaga we dolandyrmaga;
- oba hojalyk tejribeligine (keseli anyklamak, hasaba almak, maglumat binýatlary) we agrosenagat toplumyny dolandyrmaga kompýuter tehnologiýalaryny we sanly gurallary birleşdirmäge, şeýlelikde takyk oba hojalygyna (Smart Farming) geçmegi üpjün etmäge.
Şeýlelikde, fakultet Türkmenistanyň ähli oba hojalyk pudagynyň mallarynyň saglygyny goramak, azyk howpsuzlygyny üpjün etmek we tehnologiki täzelenmek üçin ýokary derejeli hünärmenleri taýýarlaýan toplumlaýyn ylym-bilim merkezi bolup hyzmat edýär.
Fakultet ýokary hünärli hünärmenleri aşakdaky hünärler boýunça taýýarlaýar:
- Weterinar lukmançylygy;
- Maglumat ulgamlary (oba hojalygynda).
Şeýle hem fakultet aşakdaky taýýarlyk ugurlary boýunça bakalawrlary taýýarlaýar:
- Ykdysadyýet we dolandyryş (oba hojalygynda);
- Buhgalterçilik hasaba alnyşy we audit (oba hojalygynda);
- Maglumat ulgamlary we tehnologiýalary (oba hojalygynda);
- Maglumat howpsuzlygynyň menejmenti (oba hojalygynda);
- Sanly dolandyryş (oba hojalygynda).
Weterinar lukmançylygy fakultetiniň gurluşynda 4 kafedra hereket edýär:
- Maldarçylyk;
- Mallaryň kesellerini anyklamak we bejermek;
- Kompýuter tehnologiýasy;
- Oba hojalygynyň guralyşy we dolandyrylyşy.
Weterinar lukmançylygy fakultetinde Weterinar lukmançylygy, Kompýuter programmalary okuw-ylmy barlaghanalary hereket edýär.
Weterinar lukmançylygy fakultetiniň çäklerinde Daşoguz welaýatynyň Döwlet weterinar gullugynda, Türkmen oba hojalyk institutynyň Okuw-tejribe hojalygynda, şeýle hem “Daşoguzobahyzmat” önümçilik birleşiginiň Daşoguz şäheriniň Hünär-tehniki mekdebinde binýatlyk kafedralary hereket edýär.
Fakultetiň mugallymlary ýurdumyzyň ýokary we orta hünär okuw mekdepleri üçin okuw kitaplaryny we okuw gollanmalaryny taýýarlap çapa hödürleýärler.
Fakultetde Türkmenistanyň Ylymlar Akademiýasy bilen bilelikde gara mallaryň Golştin tohumyny pes önümli ýerli tohum bilen çaknyşdyrmak (gatyşdyrmak) boýunça ylmy-barlag işleri alnyp barylýar. Şeýle hem, fakultetiň kafedralarynda mugallymlaryň ylmy-barlag işleri giň gerimli alnyp barylýar. Weterinar lukmançylygy fakultetinde tejribeli mugallymlaryň ýolbaşçylygynda talyplaryň ylmy-barlag işleri alnyp barylýar. Bu işleriň çäklerinde talyplara ylmy işleri alyp barmagyň usuly, usulyýeti, edebiýatlary seljermek we olara baha bermek ýaly işleri öwredilýär.
Ýaş alymlar geňeşiniň çäginde fakultetde
- Informasion gurşaw;
- Sanly dolandyryş;
- Ýaş weterinar
atly talyplaryň ylmy gurnaklary hereket edýär.
Gurnaklar institut we ýokary okuw mekdepleriniň derejesinde webinarlar maslahatlar, ylmy seminarlar, bäsleşikler, ussatlyk okuwlary, ylmy-amaly maslahatlar geçirýär. Şeýle-de önümçilik edara kärhanalara hem-de taryhy ýadygärliklere yzygiderli gezelençler guralýar.
Fakultetiň talyplary matematika, häzirki zaman kompýuter tehnologiýalary we ykdysadyýet ýaly dersler boýunça halkara we döwlet ders bäsleşiklerine gatnaşyp, uly üstünlikler gazanýarlar.
Sport, sagdyn durmuş ýörelgesini öňe sürmek boýunça döwlet syýasatynyň wajyp ornuny eýeleýär. Fakultetiň talyplary futbol, woleýbol, basketbol, milli göreş, stol tennisi, ýeňil atletika ýaly sport ýaryşlarynda, şeýle hem şaşka, küşt we düzzüm ýaly stoluň üstünde oýnalýan oýunlarynda fakultetara we ýokary okuw mekdepleriniň arasyndaky sport ýaryşlaryna gatnaşýarlar.
Institutda talyplaryň okuwdan boş wagtlaryny ýaşamak, medeni dynç almak we guramaçylykly geçirmek üçin ähli zerur şertler döredilendir. Fakultetiň talyplary institutyň “Bagtyýarlyk joşguny” atly döredijilik toparyna işjeň gatnaşýarlar. Fakultetde yzygiderli terbiýeçilik ähmiýetli dürli duşuşyklar geçirilýär, ol ýerde sagdyn durmuş ýörelgesi, Watana bolan söýgi, ýaşululara hormat goýmak wagyz edilýär. Ruhlanan fakultet talyplary “Talyp joşguny”, “Talyp gözeli”, “Berkarar döwletiň täze eýýamynyň bagtyýar gerçekleri”, “Ýylyň talyby” ýaly bäsleşiklere işjeň gatnaşyp, ençeme gezek öz döredijilik ukyplaryny subut etdiler we baýrakly orunlary eýelediler.