“HÜNÄRIME HORMATYM BAR, SARPAM BAR” ATLY BASLEŞIK GEÇIRILDI

Türkmen oba hojalyk instituty we Türkmenistanyň Magtymguly adyndaky Ýaşlar guramasynyň Daşoguz welaýat geňeşi bilen bilelikde guramagynda “Pähim-paýhas ummany Magtymguly Pyragy” ýyly mynasybetli ýaşlarda hünäre bolan söýgini kemala getirmek, ylym-bilim, döredijilik zehinini açyp görkezmek maksady bilen Türkmen oba hojalyk institutynda bilim alýan talyp ýaşlaryň arasynda “Hünärime hormatym bar, sarpam bar” atly bäsleşik geçirildi. Basleşik institutyň kafedralarynyň arasynda geçirildi. Oňa degişli hünärlerden talyplar gatnaşdylar, olar okaýan hünärini çeper sözleriň, goşgularyň üsti bilen wasp etdiler hem-de öz bilim alýan hünäriniň aýratynlygy boýunça sergi guradylar, çykyşlara görä degişli şekilli rolikleri taýýarladylar. Bäsleşige gatnaşan dürli hünärlerde bilim alýan talypardan döredilen toparlar hünärleriniň aýratynlyklary, okaýan dersleri, ele alýan hünärleri boýunça edebi-sazly çykyşlary ýerine ýetirdiler. Bäsleşigiň geçirilýän ýerinde kafedralaryň aýratynlyklaryny, okadylýan hünärlerini beýan edýän, şeyle-de oba hojalyk önümleriniň, gowaçanyň, bugdaýyň, gök-bakja ekinleriniň, oba hojalyk ekinleriniň tohumlarynyň sergisi gurnaldy.

Bäsleşikde hemmetaraplaýyn ýokary derejede çykyş edip, Bahar Ýusupowanyň müdirlik edýän Ösümlikçilik kafedrasy 1-nji orna mynasyp boldy, Şatlyk Pygamowyň müdirlik edýän Oba hojalygynyň meliorasiýasy kafedrasy, Ýunus Geldiýewiň hem-de Meretmät Meretmädowyň ýolbaşçylyk edýän Maldarçylyk, Mallaryň kesellerini anyklamak we bejermek kafedralary 2-nji orna, şeýle-de Abdulla Rahmanowyň ýolbaşçylyk edýän Kompýuter tehnologiýasy, Ýedibaý Baýramdurdyýewiň müdirlik edýän Oba hojalygynyň guralyşy we dolandyrylyşy kafedrasy, Rejepmyrat Hudaýberdiýewiň ýolbaşçylyk edýän Traktor we oba hojalyk maşynlary kafedrasy 3-nji orna mynasyp boldular.

Bize bilim-ylym bilen meşgullanmaga, döredijilikli zähmet çekmäge döredip beren giň mümkinçilikleri üçin Gahryman Arkadagymyzyň, Gahryman Arkadagly Seradrymyzyň janlary sag, ömürleri uzak, tutýan tutumlary mundan beýläk hem rowaçlyklara beslensin!!!

Bahar ÝUSUPOWA,

Ösümlikçilik kafedrasynyň müdiriniň

wezipesini ýerine ýetiriji,

biologiýa ylymlarynyň kandidaty