Türkmen oba hojalyk institutynda ylym-bilim-önümçiliik utgaşdyrylýar
Berkarar döwletiň täze eýýamynyň Galkynyşy döwründe Hormatly Prezidentimiziň taýsyz tagallary netijesinde ýurdumyzyň ykdysady kuwwatynyň berkemegine aýratyn üns berilýär. Bu işleri üstünlikli amala aşyrmakda giň dünýägaraýyşly, öz hünärine ökde hünärmenleri taýýarlamak wajyp wezipeleriň hatarynda durýar. Bu ugurda Türkmen oba hojalyk institutynyň pofessor- mugallymlarynyň nusgalyk derejede alyp barýan okuw-usuly, usuly-guramaçylyk, ylmy-barlag hem-de terbiýeçilik işleri bellenilmäge mynasypdyr.
Ýaňy-ýakynda noýabr aýynyň 13-14-i günleri Türkmen oba hojalyk institutynyň Agronomçylyk fakultetiniň Ösümlikçilik kafedrasynyň professor-mugallymlarynyň gurnamagynda Daşoguz welaýatynyň öňdebaryjy edara-kärhanalarynyň wekilleriniň gatnaşmagynda önümçilik maslahaty geçirildi. Okuw maslahaty Türkmen oba hojalyk institutynyň Okuw-tejribe hojalygynda geçirilip, oňa Daşoguz welaýatynyň Şabat etrabynyň S.Rozmetow adyndaky Oba hojalyk paýdarlar jemgyýetiniň Saýlantgy tohumçylyk we tejribe hojalygyndan, Bugdaýçylyk boýunça saýlantgy tohumçylyk hojalygyndan, Şabat etrap häkimliginden, Daşoguz welaýat tokaý hojalygyndan, Ösümlikleri goramak gullugyndan hünärmenler hem-de talyp ýaşlar gatnaşdylar.
Maslahatyň birinji gününde oba hojalygynyň dürli ugurlaryndan temalaryň çykyşlary diňlenildi.Uly mugallym, biologiýa ylymlarynyň kandidaty B. Ýusupowa “Miweli baglaryň keselleri we olara garşy göreş çäreleri” atly temada, uly mugallym oba hojalyk ylymlarynyň kandidaty M. Orazbaýewa “Gowaçanyň seleksiýasy we tohumçylygy” atly temada, mugallym A. Kutlyýewa “Däneli ekinleri ösdürip ýetişdirmegiň agrotehnikasy” atly temada eden çykyşlary diňlenildi we özara pikir alşyldy. Täsirli geçen maslahatyň ikinji güni alymlaryň we mugallymlaryň maslahaty Okuw tejribe hojalygynyň ekin meýdanlarynda dowam etdi. Bu ýerde ylmy-barlag işleriniň esaslary, usulyýeti boýunça şu kafedranyň mugallymlary A. Abdyýew ekin dolanyşygyny geçirmegiň biologiki, himiki sepäpleri, J. Gurbanowa güýzlük bugdaýyň meýdan birliginde sanyny kesgitlemegiň usulyýeti barada ylmy düşünjeleri berdiler, M. Arazow toprak nusgalaryny almagyň ayratynlygyny tejribe esasynda görkezdi, G. Nazarowa gowaça meýdanynda häzirki wagtda agrotehniki çäreleri geçirmegiň amatly möhletleri dogrusynda täsirli gürrüň berdi.
Umuman aýdylanda, geçilen önümçilik okuw maslahaty, hünärmenleriň ylmy täzelikler bilen tanyş bolmaklygyna we geljekde okuw bilen önümçiligiň utgaşykly alnyp barylmagynyň netijesinde bolsa oba hojalyk ekinlerinden bol hasyl almagyň ylmy esaslary berkidilmäge mümkinçilik bermekde uly ähmiýetlidigi bilen tapawutlandy.
Çykyş eden alymlar döwrebap bilim almaga, işlemeklige giň mümkinçilikleri döredip beren Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Bahar ÝUSUPOWA,
Agronomçylyk fakultetiniň Ösümlikçilik kafedrasynyň müdiri, biologiýa ylymlarynyň kandidaty