“Azyk howpsuzlygyny üpjün etmekde kösükli dänelileriň orny” atly ylmy webinary geçirildi

2024-nji ýylyň 28-nji fewralynda Türkmen oba hojalyk institutynyň we S.A.Nyýazow adyndaky Türkmen oba hojalyk uniwersitetiniň Ýaş alymlar geňeşiniň düzüminde hereket edýän ylmy gurnaklarynyň arasynda Bütindünýä kösükli däneliler güni mynasybetli “Azyk howpsuzlygyny üpjün etmekde kösükli dänelileriň orny” atly ylmy webinary geçirildi.

Ylmy webinara degişli ýokary okuw mekdepleriň talyplary gatnaşdylar. Ylmy webinarda talyplar kösükli dänelileriň ösdürilip ýetişdirilişi, olaryň ýerleriň melioratiw ýagdaýyny gowulandyryşy, topragy gurplandyrmakdaky ähmiýeti, topragyň hasyllylygyna edýän täsiri, ekin dolanyşygyndaky orny hem-de azyk bolçulygyny döretmekdäki ähmiýeti dogrusynda giňişleýin we ylmy barlaglara esaslanýan maglumatlar beýan edildi. Olar boýunça özara söhbetdeşlik we sorag-jogap alyşmalary ylmy webinaryň ähmiýetini has-da ýokarlandyrdy. Bu ylmy webinar gurnagynyň dowamynda Türkmen oba hojalyk institutynyň we S.A.Nyýazow adyndaky Türkmen oba hojalyk uniwersitetiniň talyplarynyň özara tejribe alyşmakda, aýratyn-da, ylmy-amaly maslahatlaryň we beýleki çäreleriň bilelikde geçirilmeginde uly ähmiýetiniň bardygy dogrusynda, hem-de olaryň terbiýeçilik hem-de öwredijilik taraplary barada bellenilip geçildi.

Ylmy webinaryň ahyrynda ýurdumyzyň milli ykdysadyýetiniň möhüm ulgamlarynyň biri bolan döwletimiziň oba hojalyk pudagyny pugtalandyrmakda, ösdürmekde alyp barýan bimöçber tagallalary üçin Gahryman Arkadagymyza hem-de Hormatly Prezidentimiz Arkadagly Gahryman Serdarymyza alkyş sözleri aýdyldy.

Ýangiljon PALÝAZOWA,
Türkmen oba hojalyk institutynyň
Agrohimiýa we topragy öwreniş kafedrasynyň mugallymy