“AGRONOMÇYLYKDA INNOWASIÝALAR” ATLY BÄSLEŞIK GEÇIRILDI

Hormatly Prezidentimiziň alyp barýan parasatly we öňdengörüjilikli döwlet syýasatyna laýyklykda, ýaşlaryň sagdyn kemala gelmekleri, döwrebap bilim almaklary, ylym bilen has içgin meşgullanmaklary, giň dünýägaraýyşly, täzeçe pikirlenýän, daşary ýurt dillerini çuňňur özleşdirýän, kärine ussat hünärmenler bolup ýetişmekleri hem-de döwrebap sanly innowasion tehnologiýalaryny öwrenmekleri we döretmekleri üçin ähli mümkinçilikler we zerur bolan şertler döredilýär.

Häzirki wagtda ýurdumyzyň ähli ýokary okuw mekdeplerinde, edaralarynda, kärhanalarynda Ýaş alymlaryň Geňeşi hereket edýär. Ýaş alymlaryň Geňeşiniň alyp barýan işi ýaşlaryň döredijilikli ylmy işjeňligini ösdürmäge, kämilleşdirmäge ýardam bermekden ybarat bolup durýar.

Hut şundan ugur alyp, 2024-nji “Pähim-paýhas ummany – Magtymguly Pyragy” ýylynyň mart aýynyň 5-i güni Türkmen oba hojalyk insititutynyň talyp ýaşlarynyň arasynda institutyň Ýaş alymlar Geňeşiniň “Inowasion Agronomçylyk” atly ylmy gurnagy tarapyndan Milli bahar baýramy mynasybetli “Agronomçylykda innowasiýalar” atly test sowalnamalary boýunça bäsleşik geçirildi.

Bäsleşik institutyň kitaphanasynda geçirilip, oňa talyp ýaşlaryň 24-si gatnaşdy. “Innowasion Agronomçylyk” atly ylmy gurnagy tarapyndan geçirilen ýokary derejeli bäsleşik talyplaryň ylma bolan gyzyklanmalaryny has-da artdyrdy. Milli bahar baýramy mynasybetli “Agronomçylykda innowasiýalar” atly bäsleşigiň şertleri boýuça ýokary netijeleri görkezen Agronomçylyk fakultetiniň II ýyl talyby Ahmedow Eziz, Gidromeliorasiýa we oba hojalygyny mehanizmleşdirmek fakultetiniň III ýyl talyplary Uzakberdiýew Mukam, Haýitmuradowa Jennet degişli fakultetleriň dekanlyklary tarapyndan Hormat hatlaryna mynasyp boldular.

Berkarar döwletiň täze eýýamynyň Galkynyşy döwründe ylmyň ösdürilmegine we ylmyň gazananlarynyň durmuşyň ähli ugurlaryna ornaşdyrylmagyna giň mümkinçilikleri döredýän türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlary sag, ömürleri uzak, belent başlary aman bolsun!

Gülşat HAÝYTMYRADOWA

Türkmen oba hojalyk institutynyň Agronomçylyk fakultetiniň Agrohimiýa we

topragy öwreniş hünäriniň 2-nji ýyl talyby