Erasmus+ HWCA taslamasy: Merkezi Aziýada howa durnuklylygy we howpsuzlygy üçin suw pudagynda ýokary bilimi pugtalandyrmak

Gysgaça maglumat:

Ýewropa Bileleşiginiň Erasmus+ maksatnamasynyň çäginde durmuşa geçirilýän 101082976-HWCA-ERASMUS-EDU-2022-CBHE (HWCA) belgili “Merkezi Aziýada howa durnuklylygy we howpsuzlygy üçin suw pudagynda ýokary bilimi pugtalandyrmak” (HWCA) atly sebitara taslamasy suw gorlaryny dolandyrmak we suw diplomatiýasy ulgamynda ýokary hünärli hünärmenleriň täze neslini taýýarlamaga gönükdirilendir. Taslama Ýewropa Bileleşiginiň we Merkezi Aziýanyň öňdebaryjy ýokary okuw mekdeplerini, şol sanda Türkmen oba hojalyk institutyny birleşdirýär.

Taslamanyň esasy maksatlary:
• Bilim maksatnamalaryny döwrebaplaşdyrmak: Ýewropanyň öňdebaryjy tejribesine esaslanyp, magistratura maksatnamalaryna innowasion usullary we täze okuw derslerini (suw diplomatiýasy, suw gorlaryny utgaşykly dolandyrmak we “ýaşyl” çäreler) girizmek;
• Mugallymçylyk mümkinçiliklerini ýokarlandyrmak: mugallymlaryň professional başarnyklaryny kämilleşdirmek we Ýewropanyň abraýly uniwersitetlerinde gysga möhletleýin okuwlary gurnamak;
• Sebitleýin hyzmatdaşlygy berkitmek: Merkezi Aziýa ýurtlarynyň arasynda suw howpsuzlygy we ekologiýa meseleleri boýunça tejribe alyşmagy we ylmy gatnaşyklary ösdürmek.

Türkmen oba hojalyk instituty bu taslamanyň çäginde suw gorlaryny rejeli peýdalanmak, oba hojalygynyň durnukly ösüşini üpjün etmek we sebitde howanyň üýtgemegine garşy durnukly ulgamlary döretmek ugrunda işjeň gatnaşýar.