Türkmen oba hojalyk institutynyň Okuw tejribe hojalygynda Daşoguz Agrohimiýa barlaghanasynyň gatnaşmagynda ylmy-barlag gözegçilik işleri geçirildi

Berkarar döwletiň Täze eýýamynyň Galkynyşy döwründe ýurdumyzyň oba hojalygyny ylmy esasda ösdürmek esasy wezipeleriň biri bolup durýar. Arkadagly Gahryman Serdarymyzyň: “Ýaşlar watanyň daýanjy” diýen parasatly sözlerinden ugur alyp geljekde ýaş oba hojalykly hünärmenleri kämil derejede taýýarlamakda Türkmen oba hojalyk institutynda hem giň göwrümli işler alnyp barylýar. Aýratynda, institutyň kafedralarynda hereket edýän ylmy gurnaklar bu ugurda täze teklipleri we maksatnamalaýyn işleri alyp barýar. Agrohimiýa we topragy öwreniş kafedrasynda hereket edýän “Kämil agrohimik” atly talyplaryň ylmy gurnagynyň ýolbaşçy mugallymlary, gurnak agzalary we Türkmen ýer taslama Döwlet taslama institutynyň topragy öwreniş ekspedisiýasynyň Daşoguz Agrohimiýa barlaghanasynyň işgärleri bilen birlikde okuw tejribe hojalygynyň topraklarynyň düzümini ylmy esasda öwrenmek maksady bilen ylmy-barlag gözegçilik işleri geçirildi.

Geçirilen barlaglaryň baş maksady, okuw tejribe hojalygynyň topraklaryndaky şorlaşma hadysasynyň derejesini kesgitlemek, şorlaşmany döredýän sebäpleri öwrenmek we oňa garşy göreş çärelerini işläp düzmekden ybarat boldy.

Ýeriň şorlulygy ösümligiň hemme ýaşaýyş hadysalaryna, ýagny fotosinteze, iýmit maddalaryň alyş-çalşyna, dem alyşa zyýanly täsir edýär, şeýlelikde ösümligiň içki we daşky şekilleriniň üýtgemegine hem-de hasylyň ep-esli azalmagyna getirýär.

Munuň bilen baglylykda, okuw tejribe hojalygynyň topraklarynyň agrohimiki, agrofiziki, suw bilen bagly häsiýetlerini ylmy esasda öwrenmek üçin ýurdumyzda ulanylýan innowasion tehnologiýalardan giňden peýdalanyldy. Türkmen ýer taslama Döwlet taslama institutynyň topragy öwreniş ekspedisiýasynyň Daşoguz Agrohimiýa barlaghanasynyň işgärleri bilen birlikde ylmy-barlag gözegçilik işleriniň geçirilmekligi netijesinde talyp ýaşlar nazary bilimlerini amalyýetde ýerine ýetirmekligi öwrendiler we geljekde ýurdumuzyň oba hojalygyny ylmy esasda ösdürmekde öz mynasyp goşandyny goşmaklyga uly itergi berdi.

Ýangiljon PALÝAZOWA,

“Kämil agrohimik” talyplar ylmy gurnagynyň ýolbaşçysy