“Topragyň gurplulygyny ýokarlandyrmagyň usullary” atly ylmy-önümçilik maslahaty geçirildi

Türkmen oba hojalyk institutynyň Agrohimiýa we topragy öwreniş kafedrasynyň gurnamagynda 2024-nji ýylyň 18-19-njy noýabr günleri Daşoguz welaýatynyň oba hojalyk edara kärhanalarynyň hünärmenleri bilen “Topragyň gurplulygyny ýokarlandyrmagyň usullary” atly ylmy-önümçilik maslahaty geçirildi. Maslahata Daşoguz welaýat häkimliginiň, Görogly we Şabat etrap häkimlikleriniň, Şabat etrabynyň S.Rozmetow adyndaky oba hojalyk paýdarlar jemgyýetiniň, Daşoguz ylmy-önümçilik synag hojalygynyň, Daşoguz Agrohimiýa barlaghanasynyň hünärmenleri, kafedranyň mugallymlary we institutyň Agrohimiýa we topragy öwreniş hünäriniň 5-nji ýyl talyplary gatnaşdy.

Ylmy-önümçilik maslahatynyň 1-nji güni kafedranyň uly mugallymy Ýazguly Ataýew “Şorlaşan topraklary özleşdirmegiň we gurplulygyny ýokarlandyrmagyň netijeli usullary”, “Agrohimiýa kartogrammanyň esasynda ekinlere dökünleriň ýyllyk kadasyny işläp düzmek” temalar boýunça, kafedranyň mugallymy Ýangiljon Palýazowa “Topragyň şorlaşma derejesini peseltmekde we onuň melioratiw ýagdaýyny gowulanmakda günebakar ösümliginiň ähmiýeti”, “Dökünleri ylmy esasda ulanmakda sanly ulgamy ulanmagyň mümkinçilikleri” atly temalar boýunça çykyş etdiler.

2-nji güni maslahat öz işini meýdan tejribeligi görnüşinde dowam etdirdi. Kafedranyň mugallymy Ogultäç Gurbanowa “Topragyň mehaniki düzümine görä ekinleri ýerleşdirmegiň aýratynlyklary”, “Topragyň mehaniki düzümini meýdan şertlerinde kesgitlemek” temalar boýunça, kafedranyň uly mugallymy Ýazguly Ataýew “Topragyň tebigy dykyzlygyny meýdan şertlerinde kesgitlemek” temasy boýunça, kafedranyň mugallymy Abdykerim Begenjow “Topragyň şorlaşma derejesini kesgitlemekde sanly tehnologiýalary ulanmak” atly temasy boýunça çykyş etdiler.

Ylmy-önümçilik maslahatynyň dowamynda maslahata gatnaşýan mugallymlaryň, hünärmenleriň we talyp ýaşlaryň arasynda edilen çykyşlar boýunça özara pikir alyşmalaryň bolmagy bu maslahatyň täsirliligini has-da artdyrdy.

Daşoguz welaýatynyň oba hojalyk edara kärhanalarynyň hünärmenleri bilen geçirilen bu ylmy-önümçilik maslahaty ylym bilen önümçiligiň arabaglanyşygyny gazanmakda möhüm çäreleriň biri boldy.

Gurbangeldi GURJIÝEW,
Agrohimiýa we topragy öwreniş kafedrasynyň uly mugallymy