Üstünlikli geçen bäsleşik
Bilim ulgamy jemgyýetiň ösmegini şertlendirýän, ähli ugurlarda üstünlikleri gazanmaga öňe iteriji güýç-kuwwaty özünde jemleýän ulgamdyr. Talyp ýaşlara berilýän bilim jemgyýetimiziň we döwletimiziň hemmetaraplaýyn sazlaşykly ösmegi üçin berk binýatdyr.
Ýakynda Berkarar döwletiň täze eýýamynyň Galkynyşy döwründe Birleşen Milletler Guramasynyň ýörite Kararnamasy esasynda dünýä döwletlerinde giňden we dabaraly bellenilýän “Halkara Bitaraplyk güni” mynasybetli Myrat Garryýew adyndaky Türkmenistanyň Döwlet lukmançylyk uniwersitetiniň gurnamagynda biologiýa dersinden III Halkara internet olimpiadasy geçirildi. Türkmen talyplary bilen birlikde dünýäniň 25 sany döwletinden talyplar gatnaşdylar. Şeýle bäsleşikleriň geçirilmegi Türkmenistanyň we daşary ýurtlaryň ýokary okuw mekdepleriniň talyplarynyň arasynda dostlukly gatnaşyklary berkitmäge we özara bähbitli ylmy-okuw maglumatlary alyş-çalyş etmäge, ýokary okuw mekdepleriniň professor-mugallymlarynyň we talyp ýaşlarynyň bilelikde ylym-bilim ulgamynda pikir alyşmalaryny guramaga, häzirki döwürde ýüze çykýan ylmy we amaly meseleleri derňemäge ukyply ýaş hünärmenleri ýetişdirmäge ýardam edýär.
Bu bäsleşikde biziň ýokary okuw mekdebimizden hem zehinli talyp ýaşlar gatnaşyp üstünlikli orunlara mynasyp boldular. Ýokary okuw mekdebimiziň talyplary Umida Rahmetjanowa I orna, Dawut Döwletgeldiýew, Amandursun Bäşimowa, Begmyrat Geldiýew, Ogulgerek Zakirjanowa, Gözel Miriýewa II orunlara, Albina Zakirjanowa, Aýşat Allaberdiýewa III orunlara mynasyp boldular.
Röwşen geljege tarap ynamly öňe barýan ajaýyp döwrümizde ýaş nesiller döwrebap tehnologiýalara, tebigy we takyk bilimlere oňat düşünýärler. Geçirilýän bäsleşikler hem talyplaryň zehinleriniň ösdürilmegine, olaryň okamaga, bilim we ylym öwrenmäge bolan höwesleriniň ýokarlanmagyna ýardam edýär. Gahryman Arkadagymyzyň, Arkadagly Gahryman Serdarymyzyň nurana geljegi nazarlaýan beýik işleriniň hemişe üstünliklere beslenmegini tüýs ýürekden arzuw edýäris!
Selbi Meredowa Türkmen oba hojalyk instutynyň Maldarçylyk kafedrasynyň mugallymy