Ylmy-önümçilik okuwlar gurnaldy
Hormatly Prezidentimiziň ýolbaşçylygynda ýurdumyzda oba hojalyk mallaryna weterinar gullugyny kämilleşdirmek bilen baglanşykly işler yzygider amala aşyrylýar. Häzirki wagtda weterinar gullugyň hünärmenleri ýokanç kesellere garşy weterinar çärelerini we öňüni alyş waksina sanjymlaryny geçirýärler, maldarçylyk önümleriniň we azyk harytlarynyň önümçiligine gözegçiligi, Türkmenistanyň çäklerini haýwanlardan adama geçýän kesellerden goragy üpjün edýärler. Weterinar gullugyň işgärleri Saglygy goraýyş we derman senagaty ministrliginiň we ýurda getirilýän ösümliklere we tohumlara gözegçilik edýän Döwlet karantin gullugynyň hünärmenleri bilen bilelikde ýurda ýaramaz hilli azyk önümleriniň we ýokanç keselli maldarçylyk önümleriniň getirilmeginiň öňüni almak maksady bilen, Döwlet serhediniň bütin ugrunda hereket edýän gümrük nokatlarynda iş alyp barýarlar.
Ýakynda Türkmen oba hojalyk institutynyň Weterinar lukmançylygy fakultetiniň Mallaryň kesellerini anyklamak we bejermek şeýle hem, Maldarçylyk kafedralary tarapyndan Daşoguz welaýat Döwlet weterinariýa gullygynda gysga wagtly okuwlar gurnaldy. Oňa Daşoguz welaýat, şäher, şeýle hem Şabat we Görogly etrap Döwlet weterinariýa gulluklaryndan hünärmenler gatnaşdy. Okuwyň dowamynda weterinariýada ulanylýan täze derman serişdeler, Daşoguz welaýatynyň çäklerinde mallaryň keselleriniň bejergi we öňüni alyş çärelerinde täzeçe çemeleşmeler, weterinar gullugyna täze ylmy tehnologiýalaryň ornaşdyrylyşy, oba hojalyk mallaryny belgilemegiň häzirki zaman usullary, sanly tehnologiýanyň weterinar lukmançylygynda ornaşdyrylyşy, weterinariýada biotehnologiýanyň ähmiýeti ýaly temalar boýunça okuw sapaklary geçildi.
Okuw sapaklarynyň ahyrynda okuw maksatnamasyna degişli birnäçe meseleler boýunça sorag-jogap alşyldy, şeýle hem käbir soraglar okuwa gatnaşýanlar hem hünärmenler tarapyndan ara alnyp maslahatlaşyldy. Şeýle okuw sapaklarynyň gurnalmagy degişli hünärmenleriň hünär taýýarlyklaryny ýokarlandyrmaklaryna ýardam edýär.
Selbi Meredowa
Maldarçylyk kafedrasynyň mugallymy