Institutymyz halkara reýtinginde hasaba alyndy

Türkmen oba hojalyk instituty 2024-nji ýylda “UI GreenMetricWorld University Ranking” atly uniwersitetleriň reýtinginde 726 orunda hasaba alyndy. Bu reýting daşky gurşawy goramak, energiýa, howanyň üýtgemegi, galyndylary dolandyrmak, ulag we durnuklylyk boýunça bitirýän işlerini bahalandyrdy. Bu ýyl bu reýtinge dünýä ýüzüniň 95 döwletinden 1477 sany ýokary okuw mekdepleri gatnaşdylar.

“UI GreenMetricWorld University Ranking” halkara uniwersitetleriň reýtingi durnukly ösüşiň maksatlaryna daýanýan birnäçe görkezijiler boýunça bahalandyrylýar. Bu halkara reýting ýokary okuw mekdebiniň gurluşy, howanyň üýtgemegi we energiýa, galyndylar, suw, ulag, ylym we gözleg ýaly ugurlar boýunça dünýäniň ýokary okuw mekdepleri bahalandyrdy. Biziň ýokary okuw mekdebimizde hem bu ugurlar boýunça netijeli işler alnyp barylýar. Esasan-da, institutymyzyň mugallymlary, işgärleri özleriniň taýýarlaýan ylmy makalalarynyň, ylmy işleriniň üsti bilen reýtingde ýokary netijeleri gazanmaga öz mynasyp goşantlaryny goşdular.

Şeýle hem bu Halkara reýtinge Türkmenistandan jemi 11 sany ýokary okuw mekdebiniň hasaba alnandygyny bellemek bolar. Türkmenistanyň ýokary okuw mekdepleriniň şeýle reýtinglere işjeň gatnaşmaklary, ýurdumyzyň ýokary okuw mekdepleriniň halkara abraýyny has-da artdyrýar. Bu ugurda amala aşyrylýan işler ýurdumyzda talyp ýaşlara berilýän bilimiň hilini has-da ýokarlandyrmaklyga, ylmy gözleglere bolan höwesi artdyrmaklyga, durnukly ösüşiň maksatlaryna ýetmeklige özüniň oňyn täsirini ýetirýär.

Ýurdumyzda ylym-bilimi ösdürmeklige, onuň dünýä ülňülerine laýyk alnyp barylmagyna giň mümkinçilikleri döredýän türkmen halkynyň Milli Lideri Gahryman Arkadagymyza, Arkadagly Gahryman Serdarymyza çäksiz sag bolsun aýdýarys!

Türkmen oba hojalyk institutynyň ylym bölüminiň hünärmeni
Şadyrdy Atakow