«MAGTYMGULY PYRAGY WE TÜRKMEN HALKYNYŇ GARAŞSYZ DÖWLETLILIK TAGLYMATY» ATLY HALKARA MASLAHATY

Berkarar döwletimiziň bagtyýarlyk döwründe hormatly Prezidentimiz Gurbanguly Berdimuhamedowyň taýsyz tagallalary netijesinde, diýarymyzyň her bir güni toýdur-baýramlara, şanly wakalara şaýat bolýar. Ýaňy ýakynda Türkmenistan Parahatçylygyň we ynanyşmagyň Watany ýylynda 2021-nji ýylyň 26-njy iýunynda Türkmenistanyň Daşary işler ministrliginiň, Türkmenistanyň Bilim ministrliginiň we Türkmenistanyň Ylymlar akademiýasynyň bilelikde guramagynda wideoaragatnaşyk ulgamy arkaly geçirilen «Magtymguly Pyragy we türkmen halkynyň garaşsyz döwletlilik taglymaty» atly halkara maslahatyna Türkmen oba hojalyk instituty hem onlaýyn arkaly widoşekilde gatnaşdy. Medeniýet we sungat işgärleriniň hem-de Magtymguly Pyragynyň şygryýet gününe bagyşlanan bu çärä dünýäniň dürli ýurtlaryndan döwlet işgärleri, meşhur ylmy wekilleri, şeýle hem syýasatşynaslary we taryhçylary gatnaşdylar.

Halkara maslahatyň açylyş dabarasynda Türkmenistanyň Ministrler Kabinetiniň Başlygynyň orunbasary M.Geldiniýazow Türkmenistanyň Prezidenti Gurbanguly Berdimuhamedowyň halkara maslahatyna gatnaşyjylara iberen gutlagyny okady. Maslahaty Türkmenistanyň Bilim ministri O.Gurbanow alyp bardy.

Halkara maslahatyň dowamynda Magtymguly adyndaky Türkmen döwlet uniwersitetiniň rektory Baýramgül Orazdurdyýewa, wideoaragatnaşyk arkaly Azerbaýjan Respublikasynyň Baku döwlet uniwersitetiniň Türkologiýa kafedrasynyň doktoranty Aýnur Matlab kyzy Safarli, Fransiýanyň iki Ylymlar akademiýasynyň agzasy, Pariž Aziýa jemgyýetiniň Filosofiýa we jemgyýetçilik ylymlary institutynyň Syýasat fakultetiniň uly mugallymy, Rio de Janeaneýro federal uniwersitetiniň professory Mirlan Namatow, Hindistanyň Merkezi Aziýany öwreniş merkeziniň müdiri, Kaşmiriň Srinagar uniwersitetiniň Şeýh-ul-alam okuw merkeziniň başlygy G.N.Haki, Hindistanyň Deli uniwersitetiniň professory Sudha Singh, Russiýa Federasiýasynyň Týumen döwlet uniwersitetiniň Sosial ylymlar we gumanitar institutynyň rus dili we umumy lingwistika kafedrasynyň professory-geňeşçisi, Türkologiýa Merkeziniň müdiri Hanisa Alişina, Täjigistan Respublikasynyň Mejlisiniň parlament etikasy boýunça komissiýanyň başlygy Barotzoda Faýzullo, Türkiýe-Türkmenistan dostluk birleşiginiň Magtymguly Ylmy komitetiniň başlygy Abdyrahman Guzel hem-de Özbegistan Respublikasynyň Milli uniwersitetiniň professory, Özbegistanyň Filosofiýa jemgyýetiniň başlygy, Halkara «Filosofiýa we durmuş» žurnalynyň baş redaktory Niginahon Şermuhamedowa çykyş etdiler.

Maslahat dört bölümden ybarat bolup, ol öz işini 4 sessiýada dowam etdi. Onuň birinji we ikinji bölümleri Magtymguly adyndaky Türkmen döwlet uniwersitetinde, üçünji bölümi Türkmenistanyň Daşary işler ministrliginiň Halkara gatnaşyklary institutynda, dördünji bölümi Halkara ynsanperwer ylymlary we ösüş uniwersitetinde geçirildi.

Halkara maslahatyň «Magtymguly Pyragynyň arzuwlan berkarar döwleti» atly birinji sessiýasynda jemi 61 çykyş meýilleşdirilip, uzak aralykdan wideoaragatnaşyk arkaly Türkiýe Respublikasynyň, Ermenistan Respublikasynyň, Fransiýa Respublikasynyň, Özbegistan Respublikasynyň, Täjigistan Respublikasynyň, şeýle hem ýurdumyzyň tanymal alymlarynyň we professor-mugallymlarynyň nutuklary diňlenildi.

«Magtymguly Pyragynyň şygryýeti – ylham çeşmesi» atly ikinji sessiýasy Magtymguly adyndaky Türkmen döwlet uniwersitetinde geçirilip, onda maksatnama laýyklykda jemi 58 çykyş meýilleşdirildi. Wideoaragatnaşyk arkaly geçirilen bu maslahata Ukraina, Hindistan, Azerbaýjan, Gyrgyzystan, Gazagystan, Türkiýe ýaly döwletlerden daşary ýurtly alymlar we ýurdumyzyň ýokary okuw mekdepleriniň, şol sanda Türkmen oba hojalyk institutynyň hem-de Türkmenistanyň Ylymlar akademiýasynyň wekilleri gatnaşdy.

Sessiýalaryň dowamynda jemi 220-den gowrak çykyşlar diňlenildi.

Maslahatyna gatnaşyjylar Gündogaryň akyldar şahyry Magtymguly Pyragynyň döredijiligini öwrenmekde we ony dünýä ýaýmakda alyp barýan asylly işleri üçin hormatly Prezidentimiz Gurbanguly Berdimuhamedowyň taýsyz tagallalaryna çäksiz sagbolsunlaryny aýtdylar.

Rejepmyrat HUDAÝBERDIÝEW,
Babageldi KURBANOW,
Türkmen oba hojalyk institutynyň mugallymlary