«Ylmy-barlag işleriň usulyýeti» atly ylmy-usuly maslahat geçirildi

Berkarar döwletiň täze eýýamynyň Galkynyşy döwründe türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň ýolbaşçylygynda oba hojalyk pudagyny ylmy esasda ösdürmek boýunça uly tagallalar edilýär. Edilýän şeýle aladalardan ugur alnyp, Türkmen oba hojalyk institutynda bu ugurda birnäçe işler alnyp barylýar.

«Pähim-paýhas ummany Magtymguly Pyragy ýyly» diýlip atlandyrylan 2024-nji ýylyň fewral aýynyň 19-24-i aralygynda Türkmen oba hojalyk institutynda «Ylmy-barlag işleriň usulyýeti» atly ylmy-usuly maslahat geçirildi. Maslahatda Ösümlikçilik kafedrasynyň uly mugallymy, oba hojalyk ylymlarynyň kandidaty Maral Orazbaýewa «Ylmy-agronomçylyk barlaglary: meýdan tejribeleri; tejribeligi meýilleşdirmek», «Meýdan tejribesiniň usulyýetiniň esasy düzüm bölekleri», «Wegetasiýa (ösüş) barlaglarynyň geçirilişiniň usulyýeti», Agrohimiýa we topragy öwreniş kafedrasynyň uly mugallymy Ýazguly Ataýew «Toprak barlaglarynyň geçirilişiniň usulyýeti», Bagbançylyk we gök ekerançylyk kafedrasynyň uly mugallymy Mährijemal Allamyradowa «Fenologiki gözegçilikleriň geçirilişi», «Ylmy makalalary taýýarlamagyň düzgüni», Oba hojalygynyň guralyşy we dolandyrylyşy kafedrasynyň uly mugallymy Gülälek Ýazmedowa «Barlaglaryň ykdysady netijeliligini kesgitlemegiň usullary», Kompýuter tehnologiýasy kafedrasynyň mugallymy Ýusupbaý Ermetow «Tejribede alnan maglumatlaryň matematiki seljerilişi», Agrohimiýa we topragy öwreniş kafedrasynyň mugallymy Ýangiljan Palýazowa «Tejribelikde hasaba almak», Maldarçylyk kafedrasynyň mugallym-öwrenijisi Serdar Muminow «Uniwersal onluk klassifikasiýa (УДК) we kitaphana-bibliografiki klassifikasiýa (ББК), halkara standart seriýa belgisi ISSN (International Standart Serial Number) barada düşünje» atly temalarda çykyş etdiler. Edilen çykyşlar oba hojalyk ulgamyndan ýokary bilimli hünärmenleri taýýarlaýan mugallymlaryň usuly taýdan kämilleşmeklerine uly itergi berdi.

Ýokary okuw mekdebiň agzybir bilim işgärleri oba hojalyk ulgamyny hemmetaraplaýyn ösdürmäge uly tagallalary edýän Gahryman Arkadagymyza, Arkadagly Gahryman Serdarymyza özleriniň çäksiz sag bolsunlaryny aýdýarlar.

Miwe NURYÝEWA

Türkmen oba hojalyk institutynyň

Jemgyýeti öwreniş ylymlary kafedrasynyň mugallymy